مولانا تورتلیکلری اوزبیک تیلید

مولانا تورتلیکلری اوزبیک تیلیده

شفیقه یارقین شاعره و محقق

	مولانا جلال الدین محمد بلخی نینگ تورتلیکلری، مولانا توغیلگنی نینگ سکیز یوز ییلگی مناسبتی بیلن کابل ده گی خلق ارا سیمینار اوچون ترجمه بولدی

مین، کمیده ییگیرمه بیش ییلدن بویان مولانا جلال الدین محمد بلخی نی تانیب، انیق راق اورگنیش و اونینگ چقور عرفانی، فلسفی و اینیقسه انسانی قره ش لرینی انگلش گه بیل باغله گن من

مولانا گه مینینگ قیزیقیشیم اونینگ حس- هیجان، درد- سوز و چین سیوگی- محبت دن لیم مالیم غزل لریدن باشلنگن ایدی

بیرینچیدن شمس دیوانی، کیین راق مثنوی معنوی نی اوقیب، کونگلیم گه جوده یقین بولگن بیت لرینی یادلب، بعضی غزللرینی مخصوص یادداشت دفتریم گه کوچیریب یورردیم

مولانا جلال الدین محمد بلخی نینگ عرفانی و عاشقانه غزللری مینینگ روحیم و یوره گیم نی قمره ب آلیب، تامیرلریم ده قاندیک یوگورردی

دری دیوانیمده گی بیر قنچه شعرلریم، اوشه الهام و تأثیر آستیده یازیلگن دیسم، مبالغه بولمسه کیره ک

بو ییللر دوامیده، مولانانی مخلصلریگه تانیتیش اوچون بیر قنچه مقاله لر یازیب، رادیو و تلویزیون آرقه لی ایشیتتریشلر تیارلب نشر ایتدیم و مولاناگه تیگیشلی ایریم علمی سیمینار و کنفرانسلرده اشتراک ایتیب، سوزگه چیقدیم

بولرگه قره مه ی، مولانانینگ شعرلرینی ترجمه قیلیش همتی و جرأتی هیچ قچان مینده توغیلمه گن ایدی، زیرا مولانانینگ عرفانی اندیشه لری و آسمانی سوزلری میندیک شعر مشق قیلیب یورگن شاگرددن شونچه لیک یوکسک و آلیس ایدی که هر قنچه تلپینسم یا اینتیلسم، مینینگ قولیم اونینگ سایه سیگه هم ییتالمسدی

یونسکو تامانیدن 2007 ییلی مولانا ییلی، دیب اعلان قیلینیشی مناسبتی بیلن کابلده، مولانا توغیلگنی نینگ سکیز یوز ییللیگی خلق ارا سیمینار آرقه لی نشانلنماقچی بولدی. بو ایشنی بجریش اوچون بیر کمیسیون توزیلدی

کمیسیون اعضاءلریدن بیری مولانانینگ اوزبیکستانده، اوزبیک تیلیگه ترجمه قیلینگن غزللر یا رباعیلرینی کریلچه الفباسیدن، افغانستان اوزبیکچه الفباسیگه اوگیریب، بیر توپلم تیارلشیم نی مصلحت بیردی

باشقه اثر لر البته بوندن آلدین ظهیرالدین محمد بابرشاه، بابر نینگ اوغلی کامران میرزا، سلطان حسین میرزا بایقرا نینگ اوغلی شاه غریب میرزا «غریبی» شعرلرینی فارسچه دن اوزبیکچه گه و اوزبیکچه دن فارسچه گه، همده فروغ فرخزاد شعرلرینی اوزبیک تیلیگه شعری ترجمه قیلگنیم، بویوک مولانا نینگ رباعیلرینی ترجمه قیلیشیم گه آز بولسه ده، جرأت و همت بیردی شفیقه یارقین

مین شمس کلیاتیدن اوزبیکستانلیک شاعر اصغر محکم قیلگن ترجمه نی ورقلب اوتدیم، بیراق افسوس که تنله گن هر بیر غزلیم نینگ، هیچ بولمگنده بیر- ایکی بیتی معنی، قافیه، وزن، و سوز گوزه ل لیگی نقطه نظریدن مینگه یاقمه گنی اوچون مذکور کتابدن غزللر تنلب، نشرگه تیارلشدن واز کیچدیم

بنابرین، اوزیم نسبتاً یخشیراق بیر ترجمه آرقه لی عزیز تیلداشلریم گه مولانا شعریتینی تانیتیش و بهره مند قیلیش گه قرار قیلدیم. شو نیتده، بو بیرینچی آدیمده مولانانینگ غزللرینی ایمس، بلکه مصرعلر حسابیدن کیچیکراق حجملی شعرلری، یعنی رباعیلرینی ترجمه قیلیشگه جرأت ایتدیم

البته بوندن آلدین ظهیرالدین محمد بابرشاه، بابر نینگ اوغلی کامران میرزا، سلطان حسین میرزا بایقرا نینگ اوغلی شاه غریب میرزا «غریبی» شعرلرینی فارسچه دن اوزبیکچه گه و اوزبیکچه دن فارسچه گه، همده فروغ فرخزاد شعرلرینی اوزبیک تیلیگه شعری ترجمه قیلگنیم، بویوک مولانا نینگ رباعیلرینی ترجمه قیلیشیم گه آز بولسه ده، جرأت و همت بیردی

مین، بو سیلنمه ترجمه لریم عیب سیز، کامل و ماهرلیک بیلن بجریلگن، دیب ایته آلمه ی من، بیراق هیچ بولمگنده، معنانی توغریراق انگلب، امانتنی رعایت قیلیب، شعرنینگ روحی و مضمون نینگ جانینی ترجمه گه کوچیریب آلالگن بولسم، مولانانینگ بویوک معنویتی آلدیده شرمسار و گناهکار بولمه گنیم دن بختیار بولر ایدیم

مین تیارلگن توپلم گه (162) ته رباعی قیسقه مدتده شاشیلینچ روشده ترجمه قیلینیب کیریتیلدی. رباعیلرنی مین تنلمه دیم، بلکه رباعیلرنینگ اوزی، ترجمه اوچون مینگه اوزینی تانیتدی، یعنی بیر اوقیشده، بیرینچی مصرع سی ترجمه بوله آلگن رباعیلر ترجمه اوچون تنلندی

کتاب نینگ بیلگی لری

مولانا جلال الدین محمد بلخی رباعیلری دیر. صحیفه لری سانی 133 و بیچیمی 13 و 21 سانتی متر بولیب، آق کاغذ ده کابل شهریده گی باسمه خانه لردن بیریده، بیر مینگ نسخه ده باسیلگن

کتاب نینگ بیرینچی صحیفه سیدن بیشینچی صحیفه سی گچه مترجم شاعر (دکتور شفیقه یارقین) نینگ سوزی و آلتینچی صحیفه دن ییگیرمه آلتینچی صحیفه گچه محمد حلیم یارقین تامانیدن یازیلگن کیریش سوز جای آلگن

	اثر نینگ آتی مولانا جلال الدین محمد بلخی نینگ تورتلیکلری ایلک مرته افغانستان اوزبیکلری اوچون خانم شفیقه یارقین تمانیدن ترجمه بولگن

محمد حلیم یارقین یازگن کیریش سوز ده مولانا جلال الدین محمد بلخی- رومی نینگ قیسقه چه شرح حالی، اونینگ تورک تبار بولگن لیگی، اثرلری، اثرلریده تورکی سوزلر، عباره لر، مصرعلر، بیت لر، تورکی – دری ملمع لر همده تولیق تورکی شعرلر بارلیگی حقیده سوز یوریتیلیب، مولانا نینگ تورکی شعرلریدن مثال لر کیلتیریلگن

شونینگدیک انه شو کیریش سوز ده مولانا اثر لری نینگ تورکچه- اوزبیکچه ترجمه لری حقیده ییترلی و قیزیقرلی معلومات توپلنگن بولیب، اونده تورکیه و اوزبیکستان ده مولانا شناس لر عالم و شاعرلر تامانیدن قیلینگن مولانا اثرلری، اینیقسه شمس دیوانی و مثنوی معنوی نینگ تورلی تورکی و اوزبیکچه ترجمه لری حقیده به تفصیل توخته لیب، تورکچه و اوزبیکچه شرح و تفسیر لر، همده مثنوی نینگ مشهور شارح لر و مفسر لری تانیتیلگن

کیریش سوز نینگ آخریده مولانا نینگ اثر لری افغانستان ده بیرینچی بولیب، دکتور شفیقه یارقین آرقه لی ترجمه قیلینگنی کورسه تیله دی

افغانستان اوزبیک شعریتی نی بای ایتیش و افغانستان ینگی اوزبیک الفباسی نی قوللش ده توتکن اورنی و اهمیتی گه علیحده توخته له دی

کتاب نینگ قالگن قسمی، یعنی 1- 107 صحیفه لریده مولانا نینگ دری رباعی لری و دکتور شفیقه یارقین نینگ اوزبیکچه شعری ترجمه سی اورین آلگن، یعنی جفت رقملی صحیفه لر ده مولانا نینگ رباعی لری و تاق رقملی صحیفه لرده اوزبیکچه ترجمه سی یوز مه یوز چاپ ایتیلگن

بو ایش البته علیحده اهمیت گه ایگه، چونکه بیرینچی دن دری تیلیدن فایده لنوچی کتابخوان لر هم اوندن فایده لنه آله دیلر، ایکینچی دن اوزبیک تیلیدن فایده لنوچی کتابخوانلر هم اوندن فایده لنه آله دیلر و اوچینچی دن علم اهلی، اینیقسه مقایسی ادبیات و ترجمه حقیده تحقیق و ایزله نیش لر آلیب باره دیگان تحقیقاتچیلر گه علمی تحقیق لری اوچون بیر منبع صفتیده یاردم بیره دی

قوییده شو کتاب نینگ صحیفه لریدن بیر قنچه اوزبیکچه شعری ترجمه نی سیز عزیز اوقووچیلر گه تقدیم ایته میز

افسوس، قرا تون دور و مین من تنها

بیر دینگیز و ساحلی اوزاق، ناپیدا

البته که کیمه م نی هدایت قیلگوم

حق دینگیزیده، اگر مدد بیرسه خدا

اول مینی مینگ لطف بیله شاد ایتدی

آخر مینی مینگ غم بیله برباد ایتدی

میندن مینی آلدی او، محبت بیرله

چون او بولدیم، ظلم نی بنیاد ایتدی

ای اول که یوزونگ قویاش کبی یاروق، کیل

سین سیز مینگه دور باغ جهان ساروق، کیل

سین سیز بو جهان غبار و توپراق دور، کیل

سین سیز مینگه دورعیش وطرب ساووق، کیل

ای بیرگوچی نان گه گوهر ایمان نی

وی بیرگوچی بیر ارپه اوچون بیر کان نی

کونگولنی خلیل گه بیرمه دی چون نمرود

آخر بیردی چِبین گه شیرین جان نی

بیزنی قیله سن اوزاقدن نظاره

مین چاره و عشق ایرور مینگه بیچاره

جان کیم؟ بیشیگیمده بیر کمینه کودک

دل کیم؟ ایشیگیمده بیر غریب، آواره