ترکی تیللر نینگ نشرات تاریخچه سی

ترکی تیللر نینگ نشرات تاریخچه سی

محمد کاظم امینی شاعر و یازوچی - میمنه

	اوزبیکی و تورکمنی تیللری بوندن اوتیز ییل آلدنگه چه اویلرده سوزلشش بیلن قمره لیب قالگن

ديمك، رسمي صورتده مطبوعات تاريخي افغانستانده امير شيرعليخان(ميلادي 1863- 1878) حكمدارليگي پيتيده«شمس النهار» ناملي جريده نينگ نشر ايتيليشي بيلن باشلنسه هم، اوشبو رسمي مطبوعات اون تورتينچي عصر نينگ بيرينچي اونليگي گه قدر يلغوز گينه اولكه پايتختي سنه لگچ كابلده خاص بوليب قالدي

بيراق، ميلادي 1929 ييل نادرخان افغانستان سياسي حاكميتيده ايريشيشي بيلن، اولكه پايتختيدن آرتيق بير خيل ولايتلرده هم رسمي مطبوعات قوريله باشله دي

محمد ظاهرشاه حاكميت تيپه سيده چيقيشي بيلن(ميلادي 1933)عصري و زمانوي مطبوعات ني رواج ورونقي اوچون ينگي امكانيتلر يره تيلدي، ليكن مطبوعات وعاموي اخبارات واسطه لري حاكم دولت سياستي ني تبليغ قيلووچي وسيله صفتيده وظيفه بجره ر ايدي

شو وقتلرده دولت ني جاري سياستي افغانستانده يشاووچي نه فقط تورك-اوزبيك خلقي، بلكه سياسي جهتدن حاكميتدن چيتلنتيريلگن باشقه كيچيك اتنيكي گروهلرني بارليگيني انكار ايتيشگه باشلندی

شو دور لرده دولت، باشقه محكوميتگه تارتيلگن مليتلر نينگ تيل وادبياتيگه توجه ايتمه سدن علاوه، اولرگه نسبتآ ملي تينگسيزليك سياست ني آلغه سوريب، اوشبو خلقلرنينگ اوز مدني حقيدن محروم ايتيب حتي كه دري و پشتو تيليدن اوزگه تيل لر، اينيقسه توركي تيل لرده سوزلاووچي كيشيلر، دولتي اداره لرگه ايشگه آلينمه ي، شونينگديك اوشبو تيللر رسميات دن چيقاريب تشله نيب، اوشبو تيل لر كوچه–بازار واويلر چار ديواري سيده«هارمنگ – بار بولينگ» تيلي بوليب قالگن ايدي

انه شونده ي بير سياست ني تاثيراتي آستيده كتته- كتته مبلغ لر خرج ايتيليشي بيلن اوشبو تيلگه منسوب نادر و قيمت بها قوليازمه نسخه لر اوت بيريليب ياكه اينگ – قيمت بها لرگه ساتيليب، تشقي موزيملرده سقلنه رايدي

	میلادی 1978. ییلدن سونگ افغانستان ده گی تورکی تیللرده نشرات ایتلیشی اساسی قانونده کریتیلدی

انه شونده ي بير سياست و حاكميت آستيده حيات كيچيره ديگن خلق و تيلگه نسبتا، 1357 هجری شمسی ييلگچه، اولكه ده كمونيستيك كودتا يوز بيريشي گه چه قدر، شو سياست دوام ايته ر ايدي

ميلادی1978 ييلدن سونگ، رسمي صورتده اولكه آنه ياسا(اساسي قانون) سيده، تور ك–اوزبيك خلقي نينگ تيل وادبياتي همده اوشبو تيل رواج ورونقي اوچون رسميات بوييچه بعضي بير امكانيتلر يره تيليب، مطبوعاتده اونينگ يوكسلتيريشي اوچون معلوم درجه ده، بعضي بير فرهنگي يوتوقلر قولگه كيله باشله دي

اوشبو ييل نينگ سرطان آييدن باشله ب اوزبيك تيليده (يولدوز) جريده سي، كيين تركمن تيليده(گوراش) جريده سي اپدن چيقه باشلب، افغانستان راديو سي آرقه لي اوزبيك– توركمن تيللريده يريم ساعتليك وقت اجره تيلدي، كيين افغانستان فنلر اكاديميه سي همده معارف وزارتيده اوزبيكچه ديپارتمنت لرني آچيليشي بيلن، باله لراوچون مكتب لرده اوزبيك تيليده درسليك لر تيارلش اوچون بعضي بير حركتلريولگه توشدي

شو وقتلرده، سياسي – دولتي سيستم لري مشترك بولگن افغانستان و ساويت اتفاقي همده اونگه قره شلي اورته آسيا جمهوريتلري، جمله دن ساويت اوزبيكستان وتوركمنستان بيلن مدني علاقه لر قوريليب، تورك – اوزبيك ضيالي لري، عالي بيليم آليش اوچون اوشبو اولكه لرگه جونه تيلدي

شو دورلرده اوزبيك تيليده گي(يولدوز) جريده سيدن آرتيق، شمال ولايتلرده باسيم دن چيقه ديگن باشقه جريده و هفته ليكلر، جمله دن فارياب وجوزجان جريده لري آرقه لي هم توركي تيللرده نشرات اوچون وقت اجره تيلر ايدي

البته بيز اوشبو مقاله آرقه لي اوتگن بير عصر اره سيده توركي تيللر ني سياسي – تاريخي وضعيتي قنده ي ايكن ليگي حقيده ايمس، بلكه اولكه ده رسمي مطبوعات وعاموي اخبارات واسطه لري قوريليشي دن باشلب، حاضرگه قدر قنچه اثرلر چاپ ايتيلگني حقيده سوز يوريتماقچي ميز

بيز اوشبو مقاله آرقه لي اولكه ميزده رسمي مطبوعات قوريليشيدن، حاضرگچه مستقل صورتده تورك – اوزبيك تيل لريده چاپ بولگن كتاب و رساله لرني بير مه بير سنه ب اوته ميز

	سونگی ییللرده گی اوزبیکی و تورکمنی تیللرده باسیلگن کتابلرنی کوپینچه سی شخصی تشبثلر نتیجه سیدیر

اگرده بعضي بير اثرلربيزنينگ قوليميزده ييتيب كيلمه گني سببلي ايسدن چيقيب قالگن بولسه، عزيز تيلداشلردن عذر سوره
ب، بيزني آگاهلنتيريب، خطا گه يول قويمس ليكلريني التماس قيله ميز

اوزبیک تیلیده باسیمدن چیققن کتابلر

اوزبيك شاعر لري، اولكه م بهاري، خلق تفكري، نادره و شعر هاي او، ديوان ظهير الدين محمد بابر، مشرب ديواني، دیوان سلطان حسين بايقرا، كيله جك باتور لري، پوپي قوش، سولاق، بير سيقيم توپراق، سوز گنجيدن نيچه در، رنگين كمان شعر، افغانستانده گي اوزبيك شاعر لري، تذكرهء شعراي جوزجانان، وطن ني ايسله ب، تانگ ييلي، كونگول سوزي، باغ لاله پوش، سوز اينجو لري، قيغو لريم – تويغو لريم، ميزان الاوزان، خمسه، محاكمة اللغتين، ينگي زمان ترانه سي، يشه سين پرتيه، آمو دريا، خلق دردانه لري، اولوغ ظفر، بابرگه ارمغان، خواجه نظر هويدا ديواني، ضرب المثل لر يا مقال لر، سوزوان قوشيق لر، عوام فالچي، ايسكي تاريخيميز، احسن الروايات في مناقب اولياء وسادات، ابرمردي بر چكاد فتح وشهادت، ارمغان جنبش، اوزبيك ادبياتي فرهنگي، ينگي آچيلگن گل لر

توركمن تيليده باسيمدن چيققن اثرلر

گلستانيمير، عقيق غاش، مخدومقلي فراغي ديواني، يينگيشلي يول، ابراهيم ادهم داستاني، تورت گل، مخدومقلي فراغي كامل ديواني

کیلگوسی هفته لرده امکان قدر مذکور کتابلرنی تانیتیشگه حرکت قیله میز