اســـتـاد مـحــمــد امــیـن مـتـیـن انـدخـویـی گـه بـخـشـــلـنـگـن شــعـــر

اســـتـاد مـحــمــد امــیـن مـتـیـن انـدخـویـی گـه بـخـشـــلـنـگـن شــعـــر

اســـــــتـاد عـالـیــشـــــــــــــان

اگر تورکی ده خوش الحان متین دور
دری ده هم گهر افشان متین دور
بسی اوچمس اثرلر یازدی بولکون
سیویملی شاعر دوران متین دور
بیراو آلیده هرگز چوزمه گن ایل
همیشه همتی جوشان متین دور
حضوریده اوییشگه ی لر ییگیت لر
اولرگه رهنما هر آن متین دور
نه یلغوز شعر اربابینی سیوگی
هنر نی همده قدر ایتگان متین دور
نه خوش انخوی تاریخنی یازدی
وقایع کویچیسی بولگان متین دور
زمانه بیلمه گی قدرینی هرگز
بو غصه اوتیده کویگان متین دور
ادب گلزاری اوندن تاپدی زینت
سوزی نگهتلی چون ریحان، متین دور
غزل یازسم ایلیمده خامه اوینر
مینگه استاد عالیشان متیت دور

هوشنگ پیگیر قویاش
لـنـدن- انـگـلـســتـان

حرمتلی عبدالله تاشقین نینگ پیامی

آریغ سقـــــــــاغ

آریغ سقـــــــــاغ


"سورمه دین کۉزلرقرا قول لرحنادین لاله رنگ "
وسمه دین قاشلربېزه لگن اېنگی(1)چاغیردن ترنگ
خرمنِ زلفی نی تېبراتگنده چوخ ایلب اووسون(2 )
جان آلور زلفین ایپاری(3 )تېرگوزور لب بی درنگ
نی عجب میگون دوداغ اوزره مېنگی (4 )مطبوع اېرور
یای(5 )اۉزه هردم اۉکوش(6 )مېنگلای نی دوراحوالی تنگ
اۉل دېسه اۉلگوم ولی تانمس مېن عشقیدین انینگ
اسرو بس مشکل که ترک اېتسه مېنی اول شوخ وشنگ
کۉیگوم ویانگوم مگرکېچمس مېن عزمیم دین تقی
چونکه مېن آنینگ تمناسېده بۉلگن مېن چوسنگ
عشق وادی سیده غم چېکدیم الم تارتدیم بسی
اوشبو یولده لاجـــــــرم قالگی ایاغدن هـــــرستنگ
سۉزی بار(7 )قامت رسامیگون لبی دورچون عسل
جانیمه سالگوسی هردم هجراۉتیدن بغـــــری سنگ
مېن بیلن،گلگون قدح،مهرو وبزم وعیش وناز
مطرب وهمده ایاغچی(8 )بزم اراتنبــــــوروچنگ
عیب اېتمانگ عشقیده وامق کېبی چېکسم عذاب
وازکېچمک لیک اېرور مېنگه بسی دورنام وننگ
لعلیگه باقدیم عرق ابریقی توشتی یادیمه
موندن هم آریغ(9 )سقاغی(10 )مېنگه دورچېکسیزقشنگ

غلام سخی وکیل زاده
کابل شهری ،15– جوزا،1387 - ییل

کابل ده نقاشلیک کؤرکزمه سی

کابل ده نقاشلیک کؤرکزمه سی

۱۳۸۸نچی ییل، اسد آیی نینگ ۲۲ نچی سی، پنجشنبه کونی، ساعت ۲ ده،کابل شهریده نقاشلیک کؤرکزمه سی بؤلیب اؤتدی . کؤرکزمه « بنیاد فرهنگ و جامعه ی مدنی» بناسیده،مذکؤر اویؤشمه تامانیدن تشکیل ایتیلگن ایدی.کؤرکزمه ده ،تنیقلی یاش نقاش بیکتاش کارگر نینگ ۶۰ ته نقاشلیک اثری نمایش ایتیلدی.

یوقاریده تیلگه آلینگن کؤرکزمه گه، یوزله ب نقاش لیک اثری شیدالری،جمله دن کابلده گی بعضی بیر چیت ایللیک ایلچی خانه لر دیپلوماتلری، عالی مجلس(پارلمان)وکیللری جمله دن فاریاب ولایتی نینگ پارلمانده گی وکیلی محترم محمد شاکر کارگر،اطلاعات وفرهنگ وزیرلیگی نماینده لری،فرهنگی شخصیتلر و ایچکی وتشقی ژورنالیستلر اشتراک ایتگن ایدیلر.
کؤرکزمه ده تنیقلی صنعتکار محترم صابر کارگر سؤزگه چیقیب،بیکتاش جان نینگ هنری فعالیتلری باره سیده مهمانلرگه هر تامانله مه ،معلومات بیردی.

بیکتاش کارگر« ففتا» خبرنگاری بیلن کابلدن تیلفون آرقه لی اؤله نیب،مذکؤر کؤرکزمه حقیده قوییده گیلرنی ایتدی:
«کؤرکزمه گه قتنشگن شخصلر مینی جوده ترغیبات و تشویقات ایتیشدی. مین افغانستانده شونچه لیک هنر سیور شخصیلر بارلیگیدن، بغایت خورسند بؤلدیم...»

بیکتاش کارکر نینگ گپیگه قره گنده، کؤرکزمه خبری « افغانستان ملی رادیو تلویزیونی»و «آیینه تلویزیونی» آرقه لی نشر بؤلگن.
شونی تاکیدله ب اؤتیش کیره ککی، بیکتاش کارگر تنیقلی یازوچی و ییتوک تاریخچی عالم مرحوم جنرال عبدالله کارگر نینگ اوغلی بؤلیب، اندخوی تومه نی نینگ کارگرخانه قصبه سیده دنیاگه کیلگن.حاضر او ۲۲ یاشده. بیکتاش حاضرگی کونده، ختای مملکتیده گی خلق ارا دیپلوماتیه فاکولته سی نینگ اوچینچی صنف طلبه سیدیر. بیکتاش ۱۱-۱۲ یاشرلیگیده، رساملیک مسابقه سیگه قتنه شیب، ایککینچی اوریننی ایگلله گن ایدی.حاضرگچه او ۴مراتبه چیت ایللرده و ایککی مراتبه ایسه، کابل شهریده نقاشلیک کؤرکزمه سینی اؤتکزگن.اونینگ نیچه ییل مقدم اؤتکزگن کؤرکزمه سی ،پاکستان اولکه سیده بؤلیب اؤتدی . بو تدبیر جاپانیلر تامانیدن اویوشتیریلگن ایدی. عموماً آلگنده ، بیکتاش قلمیگه منسوب رسملر و نقاشلیک اثرلری تیموریلردوریده یره تیلگن بنالر وآبده لرنی اؤزیده عکس ایتتیره دی -، دیسک مبالغه بؤلمه یدی.

. بیکتاش ختای تیلی بیلن بیر قطارده، انگلیس، تورکی و اردو تیللریده هم بیملال گپله شه آله دی.
بیکتاش کارگر یاشلیگیدناق، جیدو وکراته اویینلری بیلن شغلله نیب،هردایم مذکورسپورت مسابقه سیده گی حریفلرینی یینگیب کیلگن شخصلردن حسابله نه دی.

مین(راقم) تاشکند رادیو سی قاشیده ایشله یاتگن پَیتیمده ، شونی شاهدی بؤلدیمکی،بیکتاش ۲۰۰۰ نچی ییلده ،اؤزبیکستان جمهوریتی مستقللیک ییللیگی مناسبتی بیلن تاشکند خلق ارا رادیوسی،افغانستان اوچون رادیو ایشیتتیریشلری دری تیلیده گی پروگراملر تامانیدن اویوشتیریلگن رادیو مسابقه گه قتنه شیب،بیرینچی اؤریننی ایگلله ب،عالی مکافاتگه سزاوار بؤلگن ایدی.

بیکتاش جان نینگ کیلگوسی ایجادی ایشلریده ،یره تگندن اولکن موفقیتلر وآمدلر تیله ب قاله میز.

ایماق- « ففتا» نینگ کانادا مملکتی تورنتو شهریده گی خبرنگاری

مملکت شمالیده گی سیلاو ترغیباتلری

مملکت شمالیده گی سیلاو ترغیباتلری

	اوشبو یغیلیش جنبش و وحدت حزبلری نینگ کرزی دن بولگن ایلک بویوک حمایتی سنله دی

افغانستان شمالیده گی مزارشریف شهریده جنرال عبدالرشید دوستم و حاجی محمد محقق لرنینگ مینگلرچه طرفدارلری یغیلیب جمهور رئیسلیک سیلاولریده حامد کرزی نامزادلیگیدن حمایت ایتکنلر

حامد کرزی دن بولگن اوشبو حمایت حزب وحدت اسلامی رهبری حاجی محمد محقق و جنبش ملی اسلامی رئیسی سید نورالله سادات قتنه شوویده بولیب اوتکن ایلک بویوک یغیلیش سنله دی

اوشبو ایککی سیاسی حزب اوتکن آی بیرگه لشیب، حکومت گه بولگن اورین لری یوزه سیدن حامد کرزی بیلن کیلیشیب، سیلاولرده اوندن حمایت قیلیش لرینی اعلان ایتکن ایدی

هرچند حامد کرزی سیلاولرنی قازانگیدیک بولسه جنرال عبدالرشید دوستم و حاجی محمد محقق لرگه قنده ی اورین بیریشی حاضرگه چه انیق ایمس. اما ایریم معلومات لرگه کوره حامد کرزی و مذکور سیاسی حزبلر آره سیده امضالنگن رسمی حجت اساسیده هر بیریگه بیش وزیرلیک و حکومت نینگ برچه لوازملریده (ولایت، ولسواللیک، ریاست، سفارت...) 20% حق بیریلیشی قید ایتیلگن

اوتکن دور سیلاولرده جنرال عبدالرشید دوستم و حاجی محمد محقق لر حامد کرزی نینگ اساسی رقیب لریدن سنه لر ایدی

شو یوزدن حامد کرزی نینگ اوتکن بیش ییل لیک حکومتی دوریده جنرال دوستم و محقق جنابلری بیلن اورته سی یخشی بولمه ی، اساسی تنقیدچیلریدن سنلر ایدی

اوتکن آیلرده حامد کرزی جاری ییل گی سیلاو رقیبلری آره سیده بوله یاتکن کیلیشولرنی بوزیشگه حرکت قیلیب، نتیجه ده ملی جبهه نینگ اساسی عضولری و ایسکی رقیبلری بیلن کیلیشیب اولرنی کیلگوسی حکومت گه قوشیش گه قرار آلدی

حاضر کورینیشیچه اوشبو ایککی سیاستچی رهبرلرنینگ طرفدارلری کیلگوسی حکومت ده اولوش آلیش توشونچه سی بیلن اینگ کوپ نفوذی بولگن شمالی بولگه ده ترغیبات ایشلرینی باشله گن

مزارشریف ده گی حضرت علی درگاهیده بولیب اوتکن یغیلیشده حاجی محمد محقق و سید نورالله سادات لر اوز حزبلری نینگ طرفدارلریدن حامد کرزی گه رآی بیریشلرینی ایسته گنلر

هرچند اوشبو یغیلیشده حزب وحدت و جنبش ملی باشلیغلری حامد کرزی بیلن بولگن کیلیشولری حقیده معلومات بیرمه گن، اما سیلاو نامزادلری آره سیده کرزی نی "اینگ مناسب شخص" دیب ایتکنلر

همده اولر اوتکن بیش ییل دوامیده مملکت بویلب عملگه آشگن فعالیتلر و خصوصآ قیته قوریش ایشلرینی تقدیرلب، بونگه کرزی نینگ اساسی رولی بولگنی گه اورغو بیرگنلر

عین حالده سیلاو نامزادلریدن باشقه بیریسی میرویس یاسینی نینگ طرفدارلری هم مزارشریف ده گی بیر هوتل ده یغیلیب، اوز حمایتی نی اعلان ایتکن

یاسینی جنابلری نینگ سیلاو ترغیباتچیلری مذکور یغیلیشده یوزلرچه کیشی نی قتنشگنینی معلوم قیلگن

شونینگدیک کابل و کنر ولایتلریده ایسه سیلاو نامزادلریدن باشقه بیریسی سرور احمدزی نینگ طرفدارلری یغیلیب، اوندن اوز حمایتی نی اعلان ایتکن

علیشیر نوایی و ظهیرالدین محمد بابرنینگ توغیلگن کونلری مراسمیدن تصویرلر

علیشیر نوایی و ظهیرالدین محمد بابرنینگ توغیلگن کونلری مراسمیدن تصویرلر
چهارشنبه، فبروری آیی نینگ ۸-ینچی آقشامیده پایتخت کابل ده امیرالکلام علیشیر نوایی و ظهیرالدین محمد بابرنینگ توغیلگن کونلری نشانلندی. برنامه تورت بولیمدن عبارت ایدی. بیرینچی بولیمی شاعر، متفکر و دولت اربابلری میر علیشیر نوایی و ظهیرالدین محمد بابرلرنینگ حیاتی و ایجادیاتی حقیده بخش لندی. بو حقده افغانستان ده گی نوایی و بابرشناس استادلر سوزگه چیقدی لر. ایککینچی بولیمده بوگونکی برنامه نی یولگه قویگن بیلگی هفته لیگی، آیدین و هدف فرهنگی بنیادلری، یولدوز و آئینه رادیو- تلویزیونلری حقیده تیارلنگن سلایدلر و فلم لر نمایشگه قوییلدی

شوخ عیار

شوخ عیار
قیده تا كیلسه بوگون اول شوخ عیاریم ینه
وصلیدین قیلسه یاروغ بو كلبهء تاریم ینه
نیچه دوراول مشتری كیلمس منینگ حالم سوراب
تا قچان سورگای كوتوب بوحالتی زاریم ینه
تیرمولوب حسرت بیلن قالدیم بو غم وادیسیده
كیچمه گای عشقیدین اصلا قلب بی عاریم ینه
انتظاریم حاصلی دورکوک یوزونده كهكشان
تا سحر یولدوز ساچربول چشم ِ بیداریم ینه
آختریب افلاك نی دفتر كبی بیر بیر ورق
سورهء مهرو محبت ایلده دور باریم ینه
نا امید اوتسم اگر غربت ارا بول دهر دین
بغری تاش نا مهربان قالغی منی یاریم ینه
مرحمت قیلغای میدور بول عاشق ِ دلخسته گه
لطف دلداریم گه قالدی عاقبت كاریم ینه
بیرقرب اوتسه اگر بولغای كونگل غمدین رها
قیلسون آخر بیر نظر اول شوخ عیاریم ینه
آیدین رها۲۰۰۱